Галимҗан ул Дүртөйледән,
Төгәлрәге, Әсәннән.
Бабич рухы балкып тора
Ул язган һәр әсәрдән.

Безнең Әсән шундый серле,
Шигъриятле оядыр…
Бер авылга ике бөек,
Белмим, ничек сыядыр?

Аңа Бабич ышыгында
Әлбәттә, бик җайлыдыр!
Аның иҗаты кояшлы
Йә булмаса айлыдыр?

Туфрак белән судан шул ул
Шагыйрьләрнең куәсе:
Әсәннең нәкъ уртасыннан
Агып ята Күәше.

Шул Күәш барып кушылган
Агыйдел янда гына.
Мондый байлык ул, әлбәттә,
Бер Галимҗанда гына!

Шуңа күрә сәләтле ул,
Шуңа күрә әдәпле.
Ул бүген бик олы әдип
Нәкъ менә шул сәбәпле!

Мифларсыз яши алмый ул,
Мифларсыз йөри алмый.
Мифлар белән мавыкса да,
Язганы – реальный.

Язганнары, сызганнары
Почти что гениальный,
Булмаса да әсәрләре
Ул кадәр идеальный…

Кайда гына эшләсә дә,
Галимҗан оттырмый ул!
Шактый шома һәм акыллы, –
Койрыгын тоттырмый ул!

Иң гаҗәбе, ни өчендер
Юк аның дошманнары.
Шактый зур түрә булса да,
Юк аның куштаннары…

Галимҗанны сынаган бар
Инде ничә мәртәбә:
Тәртипле ул, тәрбияле,
Типкәне юк тәртәгә!

Галимҗан якты күңелле,
Тугангадыр ак кышта!
Без картаймый, кем картайсын…
Галимҗан да алтмышта!

17.02.2017

Ах, баянда уйнауларың…

Атаклы баянчыбыз

Халит Фатыйховка

Ах, баянда уйнауларың!
Үзәкне өзүләрең!
Сызганылган синең җиңнәр,
Ачылган изүләрең.

Уйнауларың үзебезчә,
Нәкъ безнең яктагыча.
Татарча да, башкортча да…
Безнең яшь чактагыча!

Уйнауларың, ах, күпләрнең
Үзәкләрен өзәдер.
Баяныңның күрекләре
Ничек кенә түзәдер?!

Ул тартуга ул күрекләр
Ничекләр өзелмидер?
Өзеләдер, өзелгәне
Тик безгә сизелмидер?

Югыйсә син баяныңны
Кочып кына йөртәсең,
Син бит аны күкрәгеңә
Кысып кына йөртәсең!

Ә шулай да кызганмыйсың,
Туйганчы сыздырасың.
Җан шикелле баяныңны
Син тәки туздырасың.

Утырам мин, сине түгел,
Баяныңны кызганып.
Ә син уйныйсың дәртләнеп,
Моңланып та сызланып…

Безнең кебек егетләрне
Син аяктан егасың!
Синең бу уйнауларыңа
Нинди баян чыдасын?!

Син уйнасаң, җырлыйсым да
Елыйсым килә башлый.
Баяныңны тартып алып
Уйныйсым килә башлый.

Тик баяның мине белми…
Ул бит сиңа өйрәнгән.
Ул бит синең бармакларга,
Синең җанга көйләнгән.

Ул бит сиңа ияләшкән
Турылыклы эт кебек!
Син генә уйный аласың
Ул баянда теттереп!

Синең шикелле иттереп
Уйный сирәкләр генә…
Баяның чыдар, чыдасын
Безнең йөрәкләр генә…

25.03.2017

Хәзер үзең җыр инде!..

Газизебез Хәния Фәрхинең вафатына

Нинди авыр җәй булды бу?
Бу соң нинди ел инде?..
Гомер буе җырладың син…
Хәзер үзең җыр инде!

Син моңлы җырга әйләндең,
Җырның да үлемсезе…
Килешми сиңа, Хәния,
Килешми «үлем» сүзе.

Син яшәрсең күңелләрдә,
Яшәрсең җырларыңда.
Кузгатырсың күңелләрнең
Иң нечкә кылларын да…

Чибәрлегең – күз алдында,
Моңнарың – күңелләрдә…
Ничекләр генә түзәрбез
Моңнарың түгелгәндә?!

27.07.2017

Һади Такташ, даһи Такташ…

(Такташка һәйкәл куелу уңаеннан)

Сәлам, Такташ!
Сәлам, даһи Такташ!
Беренче кат сине күрүем…
Истә әле, истә иҗатыңны
Беренче кат ачып керүем.

Син, әлбәттә, мине танымыйсың…
Синнән карт та, синнән яшь тә мин.
Сиңа «абый» димме, «энем» димме?..
Шундыйрак бер сәер яшьтә мин…

Мин үзем дә шигырь язган булам,
Язган булам сиңа ияреп.
Дөресрәге, шигырь язарга мин
Киләм генә әле өйрәнеп…

Шулай да мин простой шагыйрь түгел,
Әгъза да мин безнең Берлектә.
Әгъза булмасаң, син беркем түгел,
Шулай булгандыр ул элек тә…

Шигърияттә хәзер башкалар баш,
Шигърияткә килми Такташлар.
Шигырь язучылар арасыннан
Такташларны башка тапмаслар…

Кая илтә безне бу татарлык?
Кая илтә безне бу тарлык?
Шигърияттә бетте романтика,
Гыйсъянчылык бетте, бунтарьлык…

Без заманга ярамакчы булдык,
Тик заманнар безне алдады…
Шигърияттә хәзер синең кебек
«Нәни разбойник» лар калмады.

Шигърияттә хәзер башбаштаклык,
Шигърияттә хәзер ташбашлык…
Синең белән, Такташ, яңадан да
Кайтыр микән безгә такташлык?..

Казанны да танымассың, Такташ…
Казан хәзер бик нык үзгәрде.
Табулары хәзер кыен булыр
Син калдырган шигъри эзләрне.

Ул эзләрне кемнәр эзләр икән?
Алар инде күптән җуелган…
Ә шулай да иң кадерлеләре
Күңелләребезгә уелган…

Аптырама, Такташ, татарларга,
Аптырама безнең заманга…
Ярый әле кайттың, буй-сыннарың
Бик килешеп тора Казанга.

Маяковскийдан һич ким түгел! –
Әнә ничек горур баскансың!
Карашларың һаман киләчәктә,
Күкрәгеңне җилгә ачкансың…

Син бүген дә дәшми тормас идең,
Әйтер идең әйтер сүзеңне.
Яраклашмас идең заманага,
Жәлләп тормас идең үзеңне…

Белеп торам, бүгенгеләрнең дә
Тетәр идең, Такташ, тетмәсен!..
Тик мәчеткә якын баскансың син,
Муллалары кыйнап китмәсен!

4.08.2017

Сәхнәгә чыгып бассалар…

Зөлфия һәм Җәвит Шакировларга

Җәвит ул татар халкының
Талантка бик бай улы!
Төгәлрәк итеп әйтсәк, ул
«Татар халык маймылы»!

«Маймыл» ның ул иң чибәре,
Ә таланты – шаккаткыч!
Шуның иң әйбәт мисалы:
Башкатыргыч «Башваткыч»!

Бер карасаң, бик көйле ул,
Бер карасаң, кире ул…
Шунсыз булмый, ни дисәң дә,
Зөлфиянең ире ул!

Зөлфия дә һәм Җәвит тә,
Әлбәттә, бик сөйкемле!
Икесе дә бик популяр,
Почти минем шикелле!

Сәхнәгә чыгып бассалар,
Икесе дә канатлы!
Икесенә тигез итеп
Биргән Ходай талантны!

Уйлап карагыз, алар бит
Утыз ел бергә һаман…
Үзләренең мәхәббәте
Үзләренә тап-таман!

Ләйлә-Мәҗнүн мәхәббәте
Пүчтәк алар янында.
Таһир-Зөһрә мәхәббәте
Ерундарак тагын да…

Нишләр иде икән алар
Өйләнешкән булсалар?
Өйләнешеп, гомер буе
Бергә-бергә торсалар?..

Утыз елга түзмәс иде
Ул Зөһрәләр, Таһирлар…
Өйләнүгә аерылып
Бетәр иде бахырлар…

Утыз ел бер караватта…
Вәт мәхәббәт ичмасам!
Аларның бу мәхәббәте
Сүрелмәсен һичкайчан!

Сезнекенә кушылсыннар
Теләкләрем минем дә!
Бергәләп тагын утыз ел
Интексеннәр кимендә!

20.08.2017

Шигырь шулай дәвам итә…

Шагыйрь дустым Ленар Шәехкә

Шигърияттә кайныйсың син!..
Ул дөньяда ни бар, Шәех?
Синең исем хәзер бик зур:
Син бит шагыйрь Ленар Шәех!

Түгел бит син шигърияттә
Тегенди дә мондый гына…
Ә шагыйрьләр күп сөйләшми,
Алар күбрәк тыңлый гына.

Яза гына… Шулай булгач,
Күп сөйләшмә, күбрәк яз син!
Шигырьдәге дан-шөһрәтләр
Сиңа күбрәк, күбрәк язсын!

Сынап кара каләмеңне,
Яз тегесен, яз син монсын…
Ни язсаң да, язганнарың
Тик талантлы гына булсын!

Тарт та чыгар, тарт та чыгар
Талантыңны куеныңнан!..
Җәлилгә дә, Алишка да
Син бурычлы муеныңнан!

Бурычлы син шигърияткә,
Бурычлы син милләтеңә!..
Лаек булсын шигырьләрең
Бәянең иң кыйммәтенә!

Болай булса, озакламый,
Бөтен кануннарны бозып,
Син безне дә – картларны да
Китәчәксең әле узып!

Шигырь шулай дәвам итә,
Дөнья шулай бара инде…
Узып киткәч, бер булса да
Борылып та кара инде!

4.10.2017

Легендалар бар ул татарда да…

Шагыйрә Клара Булатовага

Легендалар бар ул татарда да,
Шигырьдә дә алар җитәрлек.
Ул легендаларның һәркайсысын
Мавыктыргыч роман итәрлек!..

Яратылганнар һәм яратканнар,
Таһир, Зөһрәләрне уздырып,
Кемнәрнеңдер башын әйләндереп,
Кемнәрнеңдер күзен кыздырып.

Күпмеләре безнең күз алдында,
Ә күпмесе безгә билгесез…
О, аларның асыл мәхәббәте! –
Ләйлә, Мәҗнүннәргә биргесез!

Язмышлары тоташ шигърият бит,
Ялгышлары – тоташ мәхәббәт…
Шашып яратканнар, мәхәббәттән
Көтмәгәннәр алар мәрхәмәт…

Барысы да чын да булмагандыр,
Кушылгандыр чыны, ялганы.
Легендалар яши, яшәячәк!
Кызык түгел безгә калганы…

Легендалар алар ышандыра,
Тарих хәтерендә саклана…
Легендалар хәзер юк шул инде,
Кешеләр дә хәзер ваклана.

Әллә заман шундый, арабызда
Легендалык кеше күренми.
Берсенең дә легендалык сүзе,
Легендалык эше күренми…

Легенданы заман тудыра шул,
Легенданы халык тудыра…
Тудыра да халык, яшәтә дә…
Ә теләсә, халык булдыра!

Хәтерендә сине калдыра ул
Йә калдырмый…
Заман үзгәрә…
Ә шулай да легендалар кирәк,
Легендарлар кирәк безгә дә!..

Заманында, әйе, барыбыз да
Янып сөя торган яр иде…
Татарда да матур легендалар
Бар иде шул, әйе, бар иде…

6.10.2017

Дагыстанга, майор Ленар Сабировка

Иптәш майор! Сиңа кайнар сәлам!
Ничек анда һава торышы?
«Солдат йоклый, ә служба бара»…
Шулаймы соң солдат тормышы?..

Солдатларны бик обижать итмә!
Алар да бит ата баласы…
Иминлекме анда Тау Илендә?
Тынычмы соң таулар арасы?

Син югалта күрмә сизгерлекне,
Мылтыгыңны кулдан төшермә!
Портяңкаңны бик ныгытып ура
Һәм тырышма бер дә өшергә!

Иң мөһиме, яхшы сәламәтлек!
Иң мөһиме, көн дә – зарядка!
Вакытында йокла, әмма ләкин
Йоклап китә күрмә нарядта!

Өлешеңне ашап бетереп бар,
Тәмле булмаса да, булса да…
Солдатларга күрсәтмәскә тырыш,
Сагынганда күңлең тулса да…

Болай гына әйттем… Офицерлар
Була алмый нечкә күңелле.
Мин ялгыша торганмындыр, бәлки…
Әллә инде алай түгелме?

Хәрби хезмәт хәрби хезмәт инде…
Сентиментлар ярый Казанда.
Хәрби тәртип – синең өчен закон!
Лирикага урын аз анда.

Хәрби хезмәт, беләм, җиңел түгел,
Түгел инде, беләм, ансаттан…
Хат язып тор безгә, һич югында,
Хәбәр җибәрә тор WhatsAppтан.

Дагыстанга кайнар сәлам бездән,
Гамзатовның туган җиренә!
Гамзатовның биек тауларына,
Тауларының салкын җиленә!

Җылыныр җил кайнар сәламемнән,
Тынычланыр минем теләктән!
Тыныч хезмәт телим сиңа, майор,
Теләкләрем ихлас йөрәктән!

25.12.2017

Бүген синең тантана!

(Башкортстанның халык шагыйре Наҗар Нәҗминең тууына 100 ел тулды.)

Наҗар ага! Сиңа йөз яшь!
Син һаман тере кебек! –
Тере башкорт теле кебек!
Һәм татар теле кебек!

Син үзең дә күрәсеңдер,
Без һаман исән әле!
Башкаларга бирешмичә
Яшәргә исәп әле!

Дөньялар авыр булса да,
Исәп юк югалырга…
Шигырьләрең әйди безне
Биеккә, югарыга!

Синең шигъри рухың бездә
Әле дә яши әле!
Күк күкрәтеп булмаса да,
Юк-юкта яшьни әле…

Яңа заманалар килде,
Хәзер базар заманы…
Ләкин безнең күңелләрдә
Һаман Наҗар заманы!

Чын шигырь җиңел язылмый,
Туа ул газап белән!
Син дә яздың газап белән,
Дәрт белән, азарт белән!

Синең шигырьләреңдә бит
Юк бернинди арзанлык.
Ул шигырьләрдә – Тукайлык!
Һәм, әлбәттә, Наҗарлык!

Укыйм-укыйм да мин сине,
Язганыңа таң калам!..
Бүген шигырь тантанасы!
Бүген синең тантанаң!

Наҗар агай! Сиңа йөз яшь!
Йөз яшь бит ул! Йөз бит ул!
Наҗар Галиҗәнаплары
Бөек дигән сүз бит ул!

3.02.2018

Телетапшырулар алып баручы. Илдар Кыямовка

Ничек кенә өлгерәдер?
Кайчак аптырап куям.
Инстаграмда да Кыям,
ТНВда да Кыям…

«Манзара» ларда да Кыям,
«Татарлар» да да Кыям…
Күп чакта карап туялмыйм,
Күпкәрәк китсә туям…

Кап-кара чәч, кара мыек…
Коеп куйган бу Кыям!
Кайчакта мин үземне дә
Шул Кыям итеп тоям!

Телгә тагын рифма килә,
Үземне чак-чак тыям…
Ләкин әйтмим, әгәр әйтсәм
Үпкәләр, димен, Кыям…

Кыям кылган гамәлләргә,
Әлбәттә, «лайк» куям!
Үзем лаек булган кебек,
«Лайк» ка лаек Кыям!

11.02.2018

Татарда шәп егетләр бар…

Дәүләт Думасы депутаты

Айрат Фәрраховка

Татарда шәп егетләр бар! –
Эш һәм дәүләт тотарлык!
Тик аларның күбесендә
Никтер юк шул татарлык…

Ә Айратта татарлык бар!
Кыяфәт бар! Сәләт бар!
Горурлык бар! Иң мөһиме,
Мактар өчен сәбәп бар!

Кичә аңа илле тулды!
Иң матур яшь – илле ул!
Дөресен генә әйткәндә,
Ирләр яше инде ул!

Чынын әйтим, Айрат кебек
Егетләр сирәк була.
Халкыбызга Айрат кебек
Егетләр терәк була!

Айрат шикелле табиблар
Халкыбызга терәк ул!
Халкыбызга Айрат кебек
Егетләр бик кирәк ул!

Татарлар илле яшьтә дә
Егет булырга тиеш!
Нәкъ менә Айрат Фәррахов
Кебек булырга тиеш!

Айрат мине укып бара,
Гәрчә муеннан эше…
Начар кеше була алмый
Мине укыган кеше.

18.02.2018

Олимпия чемпионы Алинә Заһитовага

Бу – гүзәллекнең җиңүе,
Матурлык тантанасы!
Бу матурлыкны данларга
Нинди сүзләр табасы?..

Бу – Актаныш гүзәллеге,
Агыйдел матурлыгы!
Бу бит Агыйдел кызының
Матурлык батырлыгы!

Күмелә гүзәл кызыбыз
Бар дөнья алкышына!
Ул алкышларга, әлбәттә,
Татарлар да кушыла!

Алинәне мин «Алиһә»
Диеп игълан итәмен!
Бар дөньяга күрсәтте ул
Татарның кем икәнен!..

Бик килә горурланасы!
Бик килә мактанасы!
Бу – татарның зур җиңүе!
Бу – татар тантанасы!

23.02.2018

Белорус язучысы Алесь Карлюкевичка

Сездә кунак булдым, Алесь дустым!
Күреп кайттым синең илеңне.
Әгәр чакырмасаң, мин илеңне
Бик тиз генә күрер идемме?..

Җиң сызганып дөнья көтәсез сез,
Соң ятасыз, иртә торасыз.
Тыныч кына, кабаланмый гына
Өр-яңадан дәүләт корасыз!

Үзегезгә сез үзегез хуҗа!
Күкрәк киереп, горур атлыйсыз!
Тик башкалар кебек мактанмыйсыз,
Бер дә юкка күкрәк какмыйсыз.

Җитә сезгә үзегезнеке дә,
Кеше өлешенә кермисез,
Башкаларга бармак янамыйсыз,
Башкаларга баш та бирмисез…

Күреп кайттым сезнең тормышны мин,
Күреп кайттым сезнең халыкны.
Үз халкыңның тыйнак халәтенә
Ошаттым мин синең холыкны.

Ярый әле чакыргансың, дустым!
Рәхмәт инде сиңа, и Алесь!..
Шигырь булып ишетелә миңа
Ике исем: Алесь! Беларусь!

4.03.2018

Шунда гына безнең аерма…

Марат дустым Әхмәтовка

Бер милләтнең ике баласы без,
Бер заманның ике улы без.
Йөрсәк тә без төрле тарафларда,
Гел кисешеп тора юлыбыз…

Дөнья булгач, гомер юлларының
Булып тора хәтәр мәлләре…
Синең күңелеңдә – җир хәстәре,
Минекендә – милләт хәлләре.

Син тумыштан җирнең үз кешесе,
Балачактан, элек-электән.
Сине җирдән аерып та булмый,
Синең кендек җиргә береккән.

Күңелләрең күккә омтылса да,
Син һәрвакыт җирдә каласың.
Синең гомер җиргә багышланган,
Син җирдә дә оча аласың!..

Ә мин – күктә!
Хыялый бер шагыйрь…
Исерек тә түгел, айнык та…
Монда рәхәт!
Монда ирекле мин!
Кирәк түгел дан да, байлык та.

Тукайчарак итеп әйтсәк әгәр,
Күк биек ул, очсыз-кырыйсыз.
Булмый икән ләкин Галәмдә дә
Бер кайгысыз яшәү, бер уйсыз…

Җирдә исә тормыш кайнап тора…
Югарыдан бар да күренә.
Башка төрле уйлар килә башлый
Җиткән чакта гомер үренә…

Мин мәңгегә күктә кала алмам,
Вакыт җиткәч, җиргә төшәрмен.
Төшкәнемә, бәлки, үкенермен,
Терсәгемне, бәлки, тешләрмен…

Бер үк җирнең ике баласы без,
Бер үк күкнең ике җаны без.
Җаваплы без җир һәм күк алдында…
Онытмыйбыз бер дә аны без!

Җир дә тарта, күк тә тарта безне,
Кайсы якка гына каерма…
Син әле дә – җирдә, ә мин – күктә…
Шунда гына безнең аерма.

13.03.2018

Ела, ела!

(Алинә Заһитова Дөнья чемпионатында җиңүче була алмады…)

Ела син, ела, Алинә!
Еласаң, җиңел була!
Чыныгалар елый-елый…
Чыныксаң, җиңеп була!

Син түгел, ирләр дә елый…
Оялма күз яшеңнән!
Бар да алда!
Син болай да
Олырак үз яшеңнән…

Синең төсле кызларга ул
Еласа да килешә,
Алар үз теләкләренә
Еласа да ирешә…

Ела син, ела, Алинә,
Күз яшьләре кибә ул!
Елый-елый көрәштисәң,
Җиңү үзе килә ул!

Җиңелүләр аша килсә,
Җиңү татлырак була!
Дөнья ул без көткәннән дә
Катлы-катлырак була…

Көтә сине яңа җиңү,
Көтә сине яңа дан!
Сөртеп ал да күз яшеңне,
Көрәшкә чык яңадан!

24.03.2018

Безнең чорга синнән ниләр калган?..

Белорусларның бөек мәгърифәтчесе

Франциск Скоринага

Милләттәшләреңә мирас булып
Калган синең бөек хезмәтләрең.
Шуңа күрә ничә гасырдан соң
Күрсәтәләр сиңа хөрмәтләрен…

Безнең чорга синнән ниләр калган? –
Халык тарихында Эзең калган!
Яңа гасырларга килеп җиткән
Бөек Эзең – Бөек Сүзең калган!

Безнең чорга синнән ниләр калган? –
Үз халкыңа әйткән Хитап калган!
Хитабыңны ташка бастыргансың…
Син бастырган Бөек Китап калган!

Безнең чорга синнән ниләр калган? –
Туган җиргә Бөек Сөю калган!
Үз халкыңа Бөек Мәхәббәт һәм
Халкың өчен Яну-Көю калган!

Тарих туфрагына күмелмичә
Скорина дигән Атың калган!
Иң мөһиме – синең исемеңне
Яд итәргә Бөек Халкың калган!

Безнең чорга синнән ниләр калган? –
Бер могҗиза калган кадәресе…
Шуңа күрә дә бит гасырларның,
Милләтеңнең син бер Кадерлесе!

Янка Купалага

(Белоруссиянең халык шагыйре Янка Купала Бөек Ватан сугышы елларында Югары Ослан районының Печище авылында яши.)

Кая барырга да белмәгәндә,
Сайладың син Идел буйларын.
Сайласаң да Идел буйларын син,
Беларусьта булды уйларың…

Татар җире сине сыендырды,
Татар илен син дә үз иттең.
Идел буйларында син җыр яздың,
Күңлең кырларында сүз иктең…

Утлы сүзең, утлы җырың булды
Дошманнарга каршы коралың!
Милләттәшләреңне яуга дәште
Шигырьләреңдәге ораның!

Янка! Янка! Идел буйларыннан
Кирәк иде сиңа китмәскә!
Тик нишләмәк кирәк, бу тормышта
Бер нәрсә дә булмый тиктәскә…

Ут эчендә калгач газиз илең,
Китәр өчен тик җай көткәнсең.
Юк, үлемгә диеп китмәгәнсең,
Үлемсезлеккә син киткәнсең…

Син халкыңның бөек Купаласы!
Син халкыңның газиз Янкасы!
Ә шагыйрьнең миссиясе авыр! –
Син халкыңның бит үз Данкосы!

Синең туган халкың әле булса
Синең шигырьләрдән ут ала!
Шигырьләреңдәге ут һәм ялкын
Кирәк әле безгә, Купала!

Шагыйрь Сүзе кирәк сугышта да,
Тынычта да кирәк милләткә.
Шагыйрь Сүзе ул бит Халык Сүзе!
Ул Сүз кыйммәт бүген бигрәк тә!

Ә халкыңа синең Шигъри Сүзең
Иртәгә дә кирәк булачак!
Шагыйрьләрсез милләт була алмый!
Яшь шагыйрьләр әле туачак!

Яңа тормыш кайный Ватаныңда!
Азат җырлар – азат Илеңдә…
Онытмыйлар сине Печищеда,
Сагыналар сине Иделдә!

7.05.2018

Без күпне күрдек инде…

Яшьтәшем Минсәгыйт Закир улы

Шакировка

Минсәгыйт дус! Синең белән
Без күп гомер кичердек!
Эчсәк тә исермәдек без,
Эчмәсәк тә исердек!

Төрле заманнарны кичтек,
Күрдек төрле чорларны.
Чорына карап җырладык
Төрле-төрле җырларны.

Эшләдек кулдан килгәнне,
Кулдан килмәгәнне дә…
Сөйләдек без белгәннәрне,
Хәтта белмәгәнне дә…

Яшь чакта кызлар яраттык,
Чибәрләр караттылар.
Шәп егетләр булганбыздыр…
Безне дә яраттылар…

Ул вакытлар онытылмый,
Әле дә күз төшкәли…
Төшкәли генә шул инде…
Күбрәк авыз пешкәли…

Бу дөньяда синең белән
Без күпне күрдек инде:
Суларга да төштек инде,
Утка да кердек инде.

Кердек инде, бу дөньяның
Кирәген бирдек инде…
Ни булса да, җиребезгә
Нык басып йөрдек инде…

Син гел өлгер! Бу юлы да
Миннән алда җитештең:
Бүген чыгып барасың син
Аръягына җитмешнең!

Менә шулай! Минсәгыйт дус,
Без дә бит җитмештәбез!
Бүген менә җитмешеңнең
Сыеннан җитешәбез!

Кемдер бүген исермәс тә,
Кемдер исерер әле…
Синең өчен эчик әле! –
Ходай кичерер әле!

01.06.2018

Агыйделдә әнә кызлар җырлый

Мин Асылыкүл кызы!

Лариса Абдуллина

Асылда, син – Асылыкүл кызы,
Асылда, син – асыл якташым!
Муеныңа гәрәбә итеп тез
Асылының асыл ак ташын!

Әйе шул, син Асылыкүл кызы!
Ерак түгел ләкин Димең дә…
Димең, дидем дә мин, уйга калдым…
Син Агыйдел кызы, кимендә…

Агыйдел – ул безнең илһамыбыз,
Агыйдел – ул безнең җырыбыз.
Җырлатты да безне, елатты да
Агыйделле шушы чорыбыз…

Агыйделдә әнә кызлар җырлый,
Агыйделдә кызлар көлешә…
Агыйделнең сылу кызы булу
Сиңа ныграк, ныграк килешә…

Үпкәләмәс сиңа Асылыкүл,
Үпкәләмәс, димен, Димең дә…
Мин – Сөннеке!
Агыйделнеке дә
Бик буласым килә минем дә…

20.08.2018

Чуваш кызы Настя

Шәфкать туташы

Анастасия Кузнецовага

Син татарча сөйләшәсең,
Татар кызы хас та.
Ләкин үзең ни өчендер
Кузнецова Настя…

«Роберт абый, исәнмесез!
Хәерле көн!» – дисәң,
Мин ун яшькә яшәрәмен
Һәм бер башка үсәм…

Чын татарча сөйләшәсең
Шундый матур итеп…
Татарча сөйләшкәнеңне
Тыңлыйм исем китеп.

Май булып ята җаныма
Һәрбер әйткән сүзең.
Чын татарча сөйләшсәң дә,
Чуваш кызы үзең.

Кәефем дә күтәрелә,
Хәлләрем дә ару,
Татарча сөйләшүең дә
Миңа үзе дару…

Хәзер инде тереләм мин,
Түгел инде хаста…
Рәхмәт сиңа, сеңелкәем,
Чуваш кызы Настя!

12.09.2018

Мәхәббәтле, бәхетле бул!

(Оныгым Регинага 18 яшь тулды)

Иң бәхетле көнең синең,
Әлбәттә, бүген инде!
Син бит әле бала гына…
Бала да түгел инде.

Син бит әле ачылып та
Бетмәгән бер гөл генә!
Гөлләр төсле матур булып
Яшә, кызым, гел генә!

Синең алда олы дөнья
Кочагын ачып тора!
Юлларыңда шаһзадәләр
Тезелеп басып тора!

Үзеңә иң охшаганын
Сайлыйсың була инде.
Син сайлаган ул шаһзадә,
Әлбәттә, уңа инде!

Син үзең дә бик бәхетле
Булырга тиеш, кызым!
Син бит минем алтын кызым,
Алтын һәм көмеш кызым!

Мәхәббәтле, бәхетле бул!
Һәрчак көлеп тор, кызым!
Мин дә сине бик яратам! –
Шуны белеп тор, кызым!

30.11.2018

Сабакташым Мөҗәһит Әхмәтҗановка шигъри хат

Казаннан сәлам, Мөҗәһит!
Түзәрлекме хәлләрең?
Синең дә буладыр инде
Төрле-төрле мәлләрең…

Ничек инде булмасын ди…
Без дә бик туздык инде.
Без дә бит малай-шалайлар
Яшеннән уздык инде…

Шулай да бирешмик әле!
Мөслимнәр ул бирешмәс!
Бирешмәс шул…
Мөслимнәргә
Бирешсә дә килешмәс…

Мөслим миңа бик кадерле!
Мөслим миңа бик якын!
Яратам Мөслим якларын,
Яратам Мөслим халкын!

Яратам дус-ишләремне,
Барлык таныш-белешне!
Яратам Яңа Сәетне
Һәм, әлбәттә, Түрешне!

Яратам мин Әмәкәйне,
Үрәзмәтне, Бүләкне,
Яратам мин Тойгилдене,
Баекны һәм Күбәкне…

Сөн төсле үк гүзәл елга
Ул тын сулы Ык икән…
Мөслим минем яратканны
Белә микән, юк микән?..

Казаннан сәлам, Мөҗәһит!
Булыгыз сау-сәламәт!
Мөслимне мин бик яратам!
Мөслимнәргә сәлам әйт!

31.12.2018

Илһам китә бездән…

Бөегебез Илһам Шакиров вафатына

Илһам китә бездән, Җыр-Моң китә…
Моңлы бер чор китә мәңгегә…
Илһам кыяфәтле Моң биргәнгә
Без мең рәхмәт әйтик Тәңрегә!

Илһам Моңы татар кешесенең
Күңеленә хаҗәт бер Моң ул,
Татарларның күңел дөньясына
Тәңгәл килгән гаҗәп бер Моң ул…

Нәкъ шул Моң бит безнең җаныбызга
Алып килде рухи бәрәкәт.
Шул Моң аркасында читләп узды
Рухи афәт, рухи һәлакәт…

Илһам Моңы, Илһам Җыры бит ул
Һәр татарның күңел халәте.
Авыр вакытларда шул Җыр-Моңга
Сыенды бит татар хәяте…

Татар җырының ул алтын чоры!
Әмма чорлар кабатланмый шул.
Йолдызлар да сүнә…
Йолдызлар да
Бер сүнгәчтен кабат янмый шул…

Илһамсыз һәм Моңсыз чор башлана.
Һәр чорның үз җыры булачак…
Ул чор инде, юк, безнеке булмас,
Ул башкалар чоры булачак…

18.01.2019

Кыңгыраулар чыңласа…

(Атаклы Илфак Смаковны сагынганда)

Кыңгыраулы атлар күрсәм
Һәм ишетсәм чыңлавын,
Исләремә төшә сине
Беренче кат тыңлавым…

Илештә, Үрге Яркәйдә
Син тәү тапкыр җырладың
Чыңлап торган тавыш белән
«Җиз кыңгырау моңнары» н.

Шул беренче ишетүем
Калган җанда сакланып.
Тыңлаган идем бирелеп,
Хисләнеп һәм сокланып.

Мин генә түгел, бөтен зал
Торып кул чапкан иде…
Син дә, мин дә яшьләр идек…
Аһ, нинди чаклар иде!

Хәтерләтеп һәм искәртеп
Гомерләрнең агышын,
Яңгырый әле, яңгырый
Синең көмеш тавышың…

Җиз кыңгырау күңелләрдә
Тынмый икән тынмаса…
Һәрчак син искә төшәсең
Кыңгыраулар чыңласа…

11.03.2019

Агыйдел кызы булып кал!

Яраткан актрисабыз

Илсөяр Газетдиновага

Мин әйтәсе сүзләр белән
Хет килешмә, хет килеш, –
Матур кызларның оясы
Йә Дүртөйле, йә Илеш!

Ул матурлыклар, әлбәттә,
Агыйделнең суыннан!
Тик кызларның матурлыгын
Аңлыйбыз шул соңыннан…

Сиңа сокланып яшәүче
Түгелдер бер мин генә.
Алар күптер инде, мин бит
Аларны белмим генә.

Сиңа көн дә гашыйк булмый,
Алар ничек чыдыйдыр? –
Кайсыберсе чыдыйдыр да,
Кайсы чыгымчылыйдыр…

Ә мин түзә алмас идем,
Ярый торам Казанда.
Казанда да матурлар бар,
Тик синдәйләр аз анда.

Сиңа шигырь язган булам,
(И шагыйрь, язганың ни?!)
Хәзер инде бу шигырьне
Яздың ни, язмадың ни…

Язасы калган иртәрәк, –
Авыз ачып калынган…
Ә бит авыз ачмый йөргән
Егетләр дә табылган.

Ул егетләр зал тулыдыр,
Юктыр миңа урын да.
Калмагандыр бер урын да
Миңа синең кырыңда.

Бу юлы да Уфаларга
Төшмәде шул юлларым.
Шуңа күрә сәламемне
Шигырь итеп юлладым.

Агыйдел кызы булып кал,
Агыйдел төсле булып,
Агыйдел төсле сөйкемле,
Дәртле һәм көчле булып!

Югалма безнең күңелдән,
Театрыбыз күгеннән!..
Казанга килүләреңне
Көтеп калам бүгеннән!