Czytaj książkę: «Акафист Восьмерице»

В последние годы коммунистического строя одна богомольная старушка во время поста молилась в храме святому Николаю Угоднику о спасении России. И вот перед глазами как бы разостлался туман, в дымке которого явились ей двое. Впереди шел святитель Николай Чудотворец и вел за руку государя Николая Александровича. Обратившись к молящейся, Николай Чудотворец сказал: «Почто просишь меня? У России ныне есть заступник, его и моли!» И, указав на государя, добавил: «Вот новый Николай Угодник, благоверный царь искупитель, святой молитвенник за Россию и за русский народ». Из сборника «Чудеса царственных мучеников» Святые царственные великомученицы со святым Григорием(Новым) молите Бога о нас!

АКАФИСТ ВОСЬМЕРИЦЕ: ЦАРЮ ИСКУПИТЕЛЮ НИКОЛАЮ И СВЯТЫМ НОВОМУЧЕНИКАМ – ЦАРИЦЕ АЛЕКСАНДРЕ, ЦАРЕВИЧУ АЛЕКСИЮ, ЦАРЕВНАМ ОЛЬГЕ, ТАТИА- НЕ, МАРИИ, АНАСТАСИИ И НОВОМУЧЕНИКУ ГРИГОРИЮ (РАСПУТИНУ) НОВОМУ В ЧЕСТЬ ИКОНЫ ИХ «ЦАРСКАЯ ГОЛГОФА»

День памяти: 4 / 17 июля

Тропарь, глас 5:

Царства земнаго лишение, / узы и страдания многоразличная / кротко претерпел еси /, свидетельствовав о Христе даже до смерти от нехристей /, святый благоверный царю искупителю Николае /, сего ради мученическим венцем на небесех / венча тя с царицею, и чады, и новомучеником Григорием Христос Бог, / Его же моли помиловати страну русскую / и спасти души наша.

Величание

царственной семье новомучеников: Величаем вас, святая восьмерице богоизбранных новомучеников, и чтим честная страдания ваша, яже за Христа претерпели есте.

Величание

царю искупителю Николаю соборного греха русского народа: Величаем, величаем тя, святый царю искупителю Николае, и чтим христоподобный подвиг и страдания твоя, яже за грех измены народа русскаго претерпеть изволил еси.

Кондак 1

Избрании Богом святии царственнии новомученицы,/ Святой Руси небесные заступницы и о людех ея молитвенницы предивнии, / благоверный царю искупителю Николае с царицею Александрою / и царственными чады Алексием, Ольгою, Татианою, Мариею и Анастасиею, / купно с великим старцем, пророком и чудотворцем Григорием, / похвальное пение приносим вам с верою и любовию; / вы же, яко имущии дерзновение к прославльшему вас Господу, / сохраните наши души от зла и печали, да зовем вас:/ Радуйся, святая восьмерице богоизбранных новомучеников, Русь Святую к покаянию призывающая.

Икос 1

Ангелов Творец и всея твари Царь и Господь, судьбы народов и царств по воли Своей управляяй, воздвиже в Руси Святой род царей благочестивых и избра тя, царю Николае, с семейством твоим и другом царевым старцем Григорием в жертву святую, всеусердную и благоприятную Господу. Мы же, дивящеся таковому о вас Божию произволению, во умилении поем вам: Радуйся, помазанниче Божий Николае, престола царства русского украшение; Радуйся, царице Александро, премудрых жен христианских красото и славо; Радуйся, царевичу Алексие, жертва непорочная, Богу принесенная; Радуйтеся, истиннии невесты Христовы и страдалицы Ольго, Татиано, Марие, Анастасие; Радуйся, человече Божий пророче и чудотворче Григорие; Радуйтеся, всем сердцем Христа возлюбившии и верность Ему даже до смерти сохранившии. Радуйся, святая восьмерице богоизбранных новомучеников, Русь Святую к покаянию призывающая.

Кондак 2

Видя сердцеведец Господь твердое изволение твое верою и правдою послужити Богу и народу твоему, благоизволил еси помазати тя, боголюбивый царю Николае, на царство русское; ты же приял еси венец царский яко послушание, Богом данное, и многия труды и скорби подъял еси ради богопредстояния и благоденствия Святой Руси, воспевая давшему ти благодать и силу ангельскую песнь: Аллилуйя.

Икос 2

Разумом светлым и сердцем чистым воле Божией повинуяся, яко благое иго Христово бразды правления державы русския приял еси, праведный царю Николае. Наипаче же поревновал еси храмов и обителей иноческих созиданию, святых угодников Божиих прославлению и православныя церкви утверждению. Сего ради, ревность твою в служении царском прославляюще, зовем ти таковая: Радуйся, от юности сердце твое Господеви предавый; Радуйся, помазанниче Божий, Духом Святым осененный; Радуйся, самодержец, скипетр царский достойно носивый; Радуйся, царское служение со страхом Божиим совершавый; Радуйся, душу твою за веру, народ и отечество положивый; Радуйся, нетленным венцем от Царя царей увенчанный; Радуйся, святая восьмерице богоизбранных новомучеников, Русь Святую к покаянию призывающая.

Кондак 3

Силою свыше укрепленный, тяжкий крест служения Богу, отечеству и народу твоему мужественно подъял еси, святый царю Николае; такожде и всем народам православным заступник явился еси, егда воздвиг славное воинство русское во спасение единоверныя страны сербския, на брань победоносную против врагов России и православия. О сем воспеваем укрепившему тя Богу: Аллилуйя.

Икос З

Имущи в сердце твоем твердое упование на всесильную помощь Божию и пламенное желание Святой Руси послужити, глаголал еси благоверный царю Николае: несть тоя жертвы, юже аз не принесл бы во благо отечества моего. Такожде научи и нас за Христа и Русь Святую души своя полагати, заповедь любви исполняюще, и воспевати тебе похвалы сия: Радуйся, Третьего Рима державный столпе и ограждение; Радуйся, людем и странам православным добрый покровителю; Радуйся, закона и правды непоколебимый хранителю; Радуйся, лукавыя советы врагов России презревый;

Радуйся, словесам богомудрым старца Григория всем сердцем внимавый; Радуйся, купно с семейством твоим скорби народа понесший; Радуйся, святая восьмерице богоизбранных новомучеников, Русь Святую к покаянию призывающая.

Кондак 4

Бурю искушений лютых воздвиже отец лжи диавол на царство твое, помазанниче Божий, дабы злобою, клеветою и коварством богоотступников погубити Русь Святую и веру православную. Ты же, государь благоверный, братоубийства в державе твоей избегнути чающе, данную ти власть и славу оставил еси, умоляя Господа, да сохранит во Святой Руси верных Богу и поющих Ему: Аллилуйя.

Икос 4

Слышаще и видяще Отечества твоего разорение, молился еси, кроткий царю, да спасет Пресвятая Богородица дом Свой – Русь Святую, и се явися образ Ея, именуемый «Державная», идеже прият Царица Небесная скипетр и державу. И бысть сие явление в радость велию всем верным, поющим тебе похвальная: Радуйся, царский венец на терновый переменивый; Радуйся, смирению Христову с любовию подражавый; Радуйся, якоже Иов многострадальный праведность в скорби явивый; Радуйся, покрову и заступлению Матери Божией страну твою вручивый; Радуйся, царскую порфиру кровию своею обагривый; Радуйся, с семейством твоим и старцем Григорием единодушно на Голгофу возшедый; Радуйся, святая восьмерице богоизбранных новомучеников, Русь Святую к покаянию призывающая.

Кондак 5

Богосветлою звездой явилася еси, славная царице Александро, приявши веру православную и всем сердцем возлюбившая молитву, храмы Божии и святых отец творения. Такожде во благочестии воспитала еси чада своя и уготовала еси их в жертву благоприятную и непорочную за Христа, воспевая Ему благодарственную песнь: Аллилуйя.

Икос 5

Видя, любящий Господь крепость веры твоея и силу терпения, пречудная царице Александро, дарова тебе вкупе с возлюбленным супругом твоим и чадами вашими чашу горьких страданий испити и мученический венец прияти. Ты же, подражающе закланному Агнцу Христу, кротко вся претерпела еси и во обители горния душею возлетела еси. О сем, поминающе вольныя страдания твоя, святая царице и мати, воспеваем ти таковая: Радуйся, в сиротстве твоем Материю Божией восприятая; Радуйся, Феодоровскому образу Владычицы посвященная; Радуйся, любовию пламенной Богом одаренная; Радуйся, православных святынь почитательнице; Радуйся, с супругом твоим в любви и благочестии пожившая; Радуйся, царственным чадам твоим мати любвео-бильная; Радуйся, святая восьмерице богоизбранных новомучеников, Русь Святую к покаянию призывающая.

Кондак 6

Проповедницы славы Божией и ревнители истиннаго благочестия явилися еси, святии царственнии супруги Николае и Александро, и образ брака благословеннаго, союза любве святаго показасте возлюбленным чадам вашим и всем чтущим вас; да воспевают благодарственно прославльшему святость вашу Богу: Аллилуйя.

Икос 6

Возсияли еси во Святой Руси, яко звезды, боговенчаннии супруги царю Николае и царице Александро, праведным житием вашим, в делех любве, милосердия, веры; вы бо чад ваших во благочестии и любве воспитали еси; с ними же в заточении от богоборцев сущи, веру, надежду и любовь к Богу сохранили есте и, мученическую кончину претерпевше, причастницы Царства Небеснаго соделастеся. Тем же, яко Святой Руси покровители, молите Бога о спасении Отечества вашего и всех, с любовию чтущих вас и поющих вам сицевая: Радуйтеся, истинный образ супружества христианского явившии; Радуйтеся, любовь небесную в житии своем показавшии; Радуйтеся, нищих и убогих милостивии покровители; Радуйтеся, смирением Христовым щедро украшении; Радуйтеся, изгнаннии правды ради, яко ваше есть Царство Божие; Радуйтеся, яко мзда ваша многа на Небесех; Радуйся, святая восьмерице богоизбранных новомучеников, Русь Святую к покаянию призывающая.

Кондак 7

Хотя человеколюбец Господь радость явити людем русским, дарова им светлаго отрока царевича Алексия, дивнаго молитвенника и заступника нашего. Сей бо во смирении сердца глаголал еси: аще бы мне царствовати на Руси Святой, да не обрящутся в ней скорбнии и нищие, но все счастливы будут. Егда же многия недуги, скорби и убиение от нехристей претерпев, в Царство Небесное возшел еси, новомучениче святый, тамо прославльшему тя Господу радостно воспел еси ангельскую песнь: Аллилуйя.

Икос 7

Новое знамение благоволения Своего ко Святой Руси яви тя Господь, царевичу Алексие, яко плод благословенный молитв Саровскаго чудотворца, надежду, славу и упование всех людей православных, Божиим же произволением, яко агнец непорочный, мученическую кончину от безбожных восприял еси и ныне ликуеши яко наследник Царства Небеснаго. Сего ради, победным венцем украшеннаго и с лики новомучеников и исповедников российских прославленнаго, ублажаем тя поюще: Радуйся, преподобному Алексию человеку Божию тезоименитый; Радуйся, царевичу Димитрию достойный сонаследниче; Радуйся, юнейший ратник в воинстве отца твоего; Радуйся, болезнь тяжкую, яко крест, смиренно понесший; Радуйся, молитвами старца Григория от смерти избавленный; Радуйся, ангельскую чистоту житием твоим явивый; Радуйся, святая восьмерице богоизбранных новомучеников, Русь Святую к покаянию призывающая.

Кондак 8

Странно есть людем христолюбивым видети, како странствие земное совершив и путь страдальческий прошед, дщи царева, равноапостольней Ользе тезоименитая, веры ради мужественно на смерть себя предаде за Владыку Жизни Христа. Сего ради, мученический венец прияв, царевна святая Ольго, со ангелы Престолу Божию предстоиши, воспевая Ему победную песнь: Аллилуйя.

Икос 8

Вси небеснии чины и святых земли русской собори радостно прияша вас, новомученицы царственнии с великим старцем Григорием, подвиг земнаго жития вашего прошедшии и жизнь вечную унаследовавшии. И вся Церковь Христова восхваляет любовь вашу и служение во славу Господа и Пречистыя Его Матери, мира Заступницы, молитвенно память вашу празднует и песни хвалебныя приносит вам: Радуйтеся, добродетелем святых предков ваших подражавшии; Радуйтеся, народу вашему даже до смерти послужившии; Радуйтеся, милости и сострадания к людем преисполненнии; Радуйтеся, вдов и сирот питатели и заступницы; Радуйтеся, клеветы, изгнание и поругание смиренно претерпевшии; Радуйтеся, силою Божией на подвиг страдальческий укреплении; Радуйся, святая восьмерице богоизбранных новомучеников, Русь Святую к покаянию призывающая.

Кондак 9

Всякое естество ангельское удивися терпению и мужеству твоему, святая царевна Татиано, ты бо всяких добродетелей преисполненная и покровительнице твоей, святей мученице Татиане, подражая, с молитвою предала дух свой в руце Божии и в Царство Небесное взошла еси, идеже со Ангелы и всеми святыми воспеваеши Богу песнь:

Аллилуйя. Икос 9

Ветии искуснии не могут достойно воспети чудное прославление ваше, святии боговенчаннии новомученицы;

исполнися бо проречение преподобнаго старца Серафима Саровскаго, яко прославльшаго его царя прославит Бог. Такожде провещанием праведного старца Николая Псковоезерскаго, прослави вас Господь на небеси купно со святым новомучеником старцем Григорием, живот свой за царственную семью положившим. Мы же, чтуще память вашу, во умилении сердца взываем сице: Радуйтеся, Христа в сердцах ваших носившии; Радуйтеся, вся печали ваша на Бога возложившии; Радуйтеся, заповедь любви до конца исполнившии; Радуйтеся, мученический подвиг славно скончавшии; Радуйтеся, от руки богоборцев смерть без ропота приявшии; Радуйтеся, крестным подвигом вашим людей русских в вере укрепившии; Радуйся, святая восьмерице богоизбранных новомученнков, Русь Святую к покаянию призывающая.

Кондак 10

Спасти хотя душу свою, святая царевно Марие, яко агница Божия к смерти себя приуготовила еси, покаянием теплым душу очистила еси и приобщением Тела и Крови Господней соединилася еси Царю Славы Христу, даровавшему ти с царственным семейством твоим и человеком Божиим Григорием живот вечный, да присно воспеваеши Ему победную песнь: Аллилуйя.