SCENA SECONDA
Michele Boccadifuoco, dalla destra, in mezzo a due carabinieri, ammanettato. È un uomo sui trentacinque, alto, robustissimo, pieno di forza. Un terzo carabiniere allontana la folla che segue Michele. Nella folla sono Filomena, Furturella e Tittariello.
La folla nella sala tace, curiosa.
1.º Carabiniere
(alla folla che impedisce il passo)
Passaggio! Passaggio!
(si arrestano per un momento)
Michele
(voltandosi)
Sie' Filumè?.. Addo' sta?..
Filomena
(si fa largo)
Sto ccà.
Michele
Mamma addo' sta?
Filomena
Sta ccà: sta venenno appriesso…
Michele
Tenitevella mmiezo a bbuie!
Filomena
Stateve a penziero cuieto.
Michele
(cercando con lo sguardo nella folla)
Furtù!
2.º Carabiniere
(lo spinge)
Avanti!
Michele
Nu mumento, brigadie'! Pe favore!
Furturella
Don Miche', che bulite?
Michele
Teniteve a mmamma mmiezo a bbuie! Datele chiacchiere!
Portiere
(ai carabinieri, uscendo sulla porta della 5.ª Sezione)
Jammo cu stu detenuto!
1.º Carabiniere
Avanti!
(Entrano nella 5.ª Sezione)
Furturella
(a Michele)
Jate! Lassate fa Dio ca è cosa 'e niente! (a Filomena) Ah, Signò! E ched'è? 'Onna Cuncetta è rummasa abbascio?
Filomena
Sta ccà. Chella è gravante e nu' po' correre.
Tittariello
Sta saglienno 'a gradiata chiano chiano. 'A vedite lloco…
SCENA TERZA
Donna Concetta
(tra altre femmine)
Concetta
(ansimando)
Ah, Mamma d' 'a Libbera! Io si nun moro stammatina nun moro cchiù!
Filomena
E assettateve! (a Sgueglia) Neh, signori mieie, ce putite favurì na seggia? (prende una sedia dal tavolo di Sgueglia).
Sgueglia
Bella figlió, ca ccà 'e segge ce servono!
Filomena
E ba buono, me', pe favore… (a Concetta) Assettateve. Curaggio, curaggio!
(Concetta siede. Tutte le donne le si mettono, impiedi, attorno)
Concetta
E che guaio niro, neh, che guaio niro ch'è chisto!
Filomena
Avite raggione! Ma vedite, io mo ve vulesse dicere na cosa… (si volta e prende un'altra sedia) Già, vuie sapite (siede) ca io so chiara e sincera e chello che tengo mmocca tengo pure…
Sgueglia
Dentro al cuore. Bella figliò, v'avite pigliata n'ata seggia!
Furturella
'O ssapite, si nun 'o ttenite p'offesa mo v' 'e pavammo sti segge!
Sgueglia
E che stammo int' 'a cchiesa?
Tittariello
(con aria spavalda)
Va bene, prufessò. Mme pare ca mo vi fate troppo a ttenere per una picciulezza di nisciunissima cunziquenza!
Sgueglia
È vero?
Tittariello
Ci vuole un poco di sciordezza!
Sgueglia
(alzandosi)
Ma, vedete, io sta sciurdezza…
Furturella
E va buono me! È cosa 'e niente… (sottovoce a Sgueglia) (Nun 'o rispunnite) Signo', aggiate pacienza!..
Sgueglia
(turbato, torna a sedere al suo posto)
Anzi! Vi prego. Fate 'o comodo vostro. Volete un'altra sedia?
Cerinaro
(accostandosi a Sgueglia)
Cerini volete!
Sgueglia
(irritato, gridando)
Vattenne! (Mo mm' 'a sconto c' 'o cerenaro)!
Concetta
(a Filomena)
Addo' se fa, sta causa?
Tittariello
(indica la 5.ª Sezione)
Là, rimpetto.
Concetta
E ched'è? Già è accumminciata?..
Furturella
Tittarie', trase, va vide!
(Tittariello entra nella 5.ª Sezione)
Concetta
Michele addo' sta?
Furturella
È trasuto llà dinto.
Concetta
Allora è accumminciata?
Voce di usciere dalla 5.ª
I testimoni, fuori!
Concetta
Uh, Mamma d' 'a Libbera! Io t' 'o metto int' 'e mmane toie miraculose! Avummaria e grazia plena! E dominus teche… (borbotta) E nunche et in ore…
Filomena e Furturella
(commosse, borbottando)
E mortissi nostri!..
Torelli
(levandosi, seccatissimo)
E ammenne! Essì! S'è aperta 'a cappella! Ma scusate, questa nun è 'a maniera! Ccà avimmo fa 'e spezziale!
Filomena
(a Torelli)
Aggiate pacienza. Chella è 'a mamma!..
Torelli
Aggio sbagliato nu cunto per la terza volta!
Voce di usciere
Avvocato Maccarelli!
Voce nella folla
Nu mumento! Sto qua!
Concetta
(a Sgueglia)
Signò, ma che stanno facenno llà dinto?
Sgueglia
(seccato, con uno sgarbo)
Io saccio chesto! (vedendo uscire Tittariello dalla 5.ª Sezione) Avete ragione! Povera madre! (Mannaggia chi nun te spara a te e figlieto!)
Concetta
(alzandosi e andando incontro a Tittariello)
Che stanno facenno?
Tittariello
Mo chiammano 'e ttestimmonie!
Concetta
Voglio trasì!..
Filomena
(trattenendola)
Gnernò! Chillo 'o figlio vuosto nun m'ha raccumannato ato!
Voce di usciere
Emilia Forcinella!
Una voce femminile
Presente!
(La levatrice Forcinella, seguita da Tina Bouquet, entra, solennemente, nella 5.ª Sezione)
Concetta
Furtù, lassateme!
Furturella
Nonzignore!
Concetta
Faciteme passà!
Filomena
Venite ccà!
Usciere
Silenzio!
Concetta
Faciteme passà, si no mme metto a strellà comm'a na pazza!.. (si dibatte) Chillo mm'è figlio! Chillo mm'è figlio!
Filomena
Ma che bulimmo fa ll'opera?
Tittariello
(a Filomena, sottovoce)
(Mantienela, ca chella sta Assunta llà dinto!)
Filomena
(meravigliata)
Chi?.. (a Concetta) Aspettate!..
Concetta
Lassate!
(Si dibatte. Appare Assunta sulla porta della 5.ª Sezione)
Filomena
(Oh! Felice notte 'e sunatore!)
SCENA QUARTA
Assunta Spina esce dalla 5.ª Sezione. È vestita da popolana, con qualche eleganza. Capelli rossi, grandi occhi neri, un fazzoletto nero le si annoda sulla cima del capo e le passa sotto il mento, nascondendo una ferita alla guancia destra. È pallida, tremante, emozionata. La segue la stiratrice Ernestina.
Assunta e donna Concetta, che va verso la 5.ª Sezione, s'incontrano. Si fissano per un momento. Attorno tutti tacciono, turbati.
Concetta
(fremente)
E ched'è? Ccà state?..
Assunta
(la guarda, silenziosa)
Concetta
(mentre Filomena cerca di trarsela via)
Pure ccà ncoppa?
Assunta
(amaramente, lenta)
Avesse dà cunto a quaccheduno?
Concetta
(ironica)
Chi? Vuie? E quanno maie avite dato cunto a quaccheduno?
Assunta
Be', meno male c' 'o ssapite.
Concetta
(riscaldandosi)
E comme, nun 'o ssaccio? 'O ssaccio a spese meie!
Filomena
(cerca di spingere donna Concetta verso il tribunale)
'Onna Cuncè…
Assunta
Pe revula vosta, si so' benuta cca ncoppa so benuta a fa n'opera bona!
Concetta
(con impeto, facendosele più accosto)
Chi? Tu?
Filomena
(c. s.)
'Onna Cuncè!..
Concetta
(furibonda, a Assunta)
Tu si' benuta a fa opera bona?.. Tu mme lieve nu figlio 'a sotto 'o sciato, e po dice ca si' benuta a fa opera bona!
Sgueglia
(che ascolta, come gli altri, rivolto a Torelli)
Siente, sie'!..
Tittariello
(a donna Concetta)
Va bene, questi sono fatti ca s'apparono a un'arda parte. Ccà stammo ncopp' 'o Tribbunale… Mannaggia 'a palella!..
Sgueglia
(Ncasa 'a mano!)
Assunta
(eccitatissima)
Sentite, 'onna Cuncè…
Filomena
(a Concetta)
Jammo!.. (a Assunta) Po nce 'o dicite quanno esce 'on Michele a libbertà. Sperammo ca tutto riesce a bbene…
Concetta
(a Filomena, scostandola)
Lassateme sentí che dice…
Voce d'usciere
Il piantone!
Piantone
Qui! Qui!
(Passa correndo una guardia di P. S.)
Assunta
(si è avvicinata molto a Concetta. Le parla quasi sottovoce, fremendo, a denti stretti)
Vuie avite raggione. Vuie mm'avarisseve sputà nfaccia, pecchè io so' stata 'a causa e 'a corpa 'e tutto chello ch'è succieso!..Concetta(ironica)Se', se', mo mme te faie c' 'a vocca!Assunta(snoda il fazzoletto. Appare la cicatrice alla guancia: un lungo segno rosso. Afferra Concetta pel braccio e si mette un dito sulla cicatrice).Tiene mente ccà!(Sgueglia, Torelli e altri si levano e guardano, curiosi)
Concetta
(ironica)
Se', se', mo mme te faie c' 'a vocca!
Assunta
(snoda il fazzoletto. Appare la cicatrice alla guancia: un lungo segno rosso. Afferra Concetta pel braccio e si mette un dito sulla cicatrice)
Tiene mente ccà!
(Sgueglia, Torelli e altri si levano e guardano, curiosi)
Concetta
(torcendo lo sguardo e cercando di liberarsi)
Le'!..
Assunta
(c. s.)
Chesto me l'ha fatto Michele, figlieto!
Concetta
(c. s.)
Lasse!
Furturella
(a Assunta)
Lassate! Ma c' 'a vulite fa vení na cosa?!
Assunta
(c. s.)
Figlieto m'ha tagliata 'a faccia!
Filomena
(a Assunta)
Zitto!..
Assunta
(lascia il braccio di Concetta. Premendosi il fazzoletto sulla gota soggiunge, sottovoce, indicando la 5.ª Sezione)
E io, nu mumento primmo, llà dinto, 'o bbedite, llà dinto… aggio ditto ca nun era stato isso!
Concetta
(emozionata e irritata, a Filomena, trascinandola verso la 5.ª Sezione)
Jammo!..
Assunta
(ironica)
Jate, jate.
(Concetta e Filomena entrano nella 5.ª Sezione)
Voce di usciere
(dalla 8.ª Sezione)
Giuseppe Citarelli!
Un popolano
(a un altro che siede in fondo e dorme)
Gué, Peppí, scétete!
L'altro popolano
(mezzo desto)
Ch'è stato?..
Il primo popolano
Te stanno chiammanno! Sùsete!
Voce di usciere
Citarelli Giuseppe!
L'altro popolano
Presente! Sto ccà! E si cheste nun me fanno passà! (rivolto a Ernestina e Assunta) Faciteme passà! Premmettete!.. (entra nella 5.ª Sezione).
SCENA QUINTA
Federigo Funelli e Epaminonda Pesce dalla sinistra, a braccetto. Assunta è rimasta indietro, pensosa. Accanto le sta Ernestina, che sbuccia un'arancia. Si odono voci dalla 5.ª Sezione. Assunta porge l'orecchio.
Pesce
(sottovoce a Federigo, indicando Assunta)
('A vi' llánno!)
Federigo
(la vede, sottovoce a Pesce)
(E 'a do' è asciuta?) (s'accosta al tavolo di Sgueglia) 'On Diodà, ccà sta 'a livrera vosta! (a Pesce, piano) (Fatte ccà).
(Pesce s'accosta anche lui)
Sgueglia
(a Federigo, cessando di scrivere)
Padrone mio. E che ghiate facenno 'a chesti pparte?
Federigo
(guardando sempre Assunta)
Tengo 'e pitture int' 'a cammera mia e me n'aggio avuto ascí pe disperazione. Stanno pittanno tutta 'a cancelleria. (a Pesce, piano) (Che fa? S'accosta?)
Pesce
(sottovoce)
(Mo…).
Sgueglia
Bravo! Vi state mettendo in bello? (Assunta si accosta. A Ernestina) Bella figlió, nun menate 'e scorze nterra.
Pesce
(sottovoce a Federigo)
(Se sta accustanno).
Federigo
(distratto, a Sgueglia)
Come dite? (a Pesce c. s.) (Assettammece).
Sgueglia
Ho detto: Vi state mettendo in bello? (seguita a scrivere).
Pesce
(a Federigo, c. s.)
('A vi lloco!)
(Assunta si ferma accosto al tavolo di Torelli)
Federigo
(a Pesce, c. s.)
(Lèvete 'a nanze). Come dite, 'on Diodà?
Sgueglia
(smette di scrivere e lo guarda, meravigliato e seccato)
Assunta
(a Ernestina)
Assettammece. (seggono accanto al tavolo di Torelli, che non se ne avvede, occupato com'è a scrivere).
Sgueglia
(a Federigo, con intenzione)
Don Federì, ho detto: Vi state mettendo in bello?
Federigo
Già… scusate… In bello… (pigliando una sedia e sedendo accanto al tavolo di Sgueglia). Voi permettete?
Sgueglia
(con intenzione, guardando Assunta e don Federigo)
In bello!.. Bello come voi… Accomodatevi. (si rimette a scrivere).
Federigo
(a Torelli)
'On Anié', servo vostro!
Torelli
(levando gli occhi)
Oh! Padrone! (guardando Assunta e Ernestina) (N'ato accunto!).
SCENA SESTA
Donn'Emilia, Tina Bouquet e detti
Voce di usciere
(dalla 5.ª Sezione)
Giuseppina Auletta!
(Una giovane popolana arriva dalla destra e va alla 5.ª Sezione. Fa per entrarvi. Movimento di sorpresa di Assunta, che si è voltata udendo quel nome)
Assunta
(a Ernestina)
Peppenella! Tu 'e' visto?
Ernestina
Uh, overo!
Assunta
(si leva)
E mo che bbene a dicere, ccà?
Donn'Emilia
(uscendo con Tina dalla 5.ª Sezione e incontrandosi con l'Auletta che le dà uno spintone)
Piano! E ched'è? Jate 'e pressa?
Auletta
E te lieve 'a miezo? Vi' quanta cummerità!
Donn'Emilia
(irritata, sorpresa)
Essì! Ha dda passà sta principessa!
Auletta
(sulla soglia della 5.ª Sezione, voltandosi minacciosa)
Ossà, statte zitta, ca si no quann'esco te ncaso 'a mallarda int' 'e recchie!
Donn'Emilia
(urlando)
A chi? A chi?..
Tina
Mammà!..
Usciere
Giuseppina Auletta!
Auletta
(entra nella sala)
Presente! Presente!
Donn'Emilia
(rivolta verso la Sezione)
A chi 'a ncase 'a mallarda?
Tina
(riconducendola avanti scena)
Mammà, non fate scenate! Ca io mme metto scuorno!
Assunta
(che Ernestina tenta invano di trattenere)
No! Io aggia sentì chella che dice!
Ernestina
Stateve ccà!
Assunta
No! Aggia trasí! (entra nella 5.ª Sezione, seguita da Ernestina).
Donn'Emilia
(a Tina, furiosa)
'E' visto? Io t' 'avevo ditto ca ccà ncoppa mme ntussecavo! Mme ncasava 'a mallarda, mme ncasava! (verso la 5.ª Sezione) 'A ncase a chella bellella 'e soreta ca va facenno 'a culumbrina pe ncopp' 'e marciappiede 'e Tuleto!
Tina
Mammà! Mammà!..
Federigo
(levandosi)
Donn'Emì, che cos'è?
Tina
(a Emilia)
Adderezzateve 'o cappiello…
Donn'Emilia
(a Federigo, raddrizzandosi il cappello enorme)
Ch'è stato? È stato ca na vrenzola qualunque se piglia l'ardire 'e dicere nfaccia a una signora: Te ncaso 'a mallarda int' 'e recchie! Puh! Pe la faccia 'e mammeta e pateto!
Sgueglia
(All'arma d' 'a signora!)
Tina
Mammà, basta mo!
Donn'Emilia
Chi 'a sape? Chi l'ha vista maie a sta tale e quale?
Cerinaro
Cerini!
Federigo
(a donn'Emilia)
E nu' ve pigliate collera!
Donn'Emilia
Embè, 'o crerite? M'ha fatto saglì tutto 'o sango 'a parte 'a capo!
Federigo
Assettateve!.. (cerca una sedia al tavolo di Sgueglia)
Sgueglia
(piano, a Federigo)
('On Federì, chi è sta signora?)
Federigo
(piano, a Sgueglia)
('On Emilia, 'a vammana sotto all'arco d' 'o Lavenaro) Don Diodà, con permesso… (prende la sedia e l'offre a donn'Emilia).
Sgueglia
Prego! (a donn'Emilia) Assettateve… Qui non si paga niente! (Emilia siede).
Tina
(a Sgueglia)
Scusi, sa!
Sgueglia
(rimettendosi a scrivere)
Oh, niente, sa!
Pesce
(a donn'Emilia, indicando Tina)
La signorina è vostra figlia?
Federigo
Presento. Il mio amico Epaminonda Pesce. Macchiettista.
(Inchini da ogni parte)
Tina
Ah!
Donn'Emilia
(a Pesce)
Aspettate! Ma lei avete cantato all'Edèn?
Pesce
A servirla.
Donn'Emilia
Favorirmi! Ma allora io ve tengo stampato ncuorpo!..
Pesce
Tropp'onore…
Donn'Emilia
Io ve so benuta a sentì ogne sera!
Federigo
Emulo di Maldacea!
Pesce
Macché! (a Tina) E lei ci veniva all'Eden?
Tina
No, veramente. Io stavo scritturata a Roma…
Pesce
Ah, sí? A Roma? E dove? Al Margherita?
Tina
No, no, allo Sferisterio… (restano a parlare in fondo).
Federigo
'On Emì, levateme na curiosità…
Donn'Emilia
(sottovoce)
'On Federí, io ho capito: avite mise ll'uocchie ncopp' 'a rossa!
Federigo
(sorridendo)
Io!? No!
Donn'Emilia
Va buono, 'on Federì, nuie ce cunuscimmo; jammo' a ffranche!
Federigo
Ma queste sono supposizioni vostre…
Donn'Emilia
E dàlle! 'On Federì, nun facite 'o ggesuita! (Lo prende per il bavero del soprabito e lo scuote).
Federigo
(sorridendo, sottovoce)
Ma chi è?.. Na vicina vosta?
Donn'Emilia
Gnernò; na vota eremo vicine. Mo essa sta a Sant'Aniello a Custantinopole, vicino a l'ispezzione 'e Pubblica Sicurezza. Sapite chella puteca 'e stiratrice ca int' 'a staggione tene chella perziana verde?..
Federigo
Ho capito. Ma voi…
Donn'Emilia
Io sto sempe 'o Lavenaro, sott'all'arco. E accussì poco ce vedimmo cchiù. (Cava di tasca un pacchettino). Vulite nu poco 'e ciucculata Sciusciarre?
Federigo
Grazie. Dunque voi siete testimone alla causa?
Donn'Emilia
Precisamente.
Federigo
E chillo c'hanno purtato llà dinto, chi è? (indica la 5.ª Sezione).
Donn'Emilia
Chi? 'On Michele? E 'o nnammurato d'Assunta.
Federigo
Ah? Così si chiama?
Donn'Emilia
(mangiando)
Chi?
Federigo
Assunta?
Donn'Emilia
(mangiando)
Assunta Spina. E che spina!..
Voce di usciere
Giovanni Mazzarella!
Voce nella folla
Presente!
(Entra un uomo nella 5.ª Sezione. L'usciere chiude la porta)
Donn'Emilia
(a Federigo)
Pe ve fa capì a buie, st'Assunta mo so' quase tre anne ca sta cu stu don Michele, ch'è nu chianchiero abbascio 'e Ccavajole.
Federigo
(atto di sprezzo)
Nucchiù?
Donn'Emilia
E pecchè? Che l'avite dicere? Ma mo sapite ca 'e chianchiere manteneno 'e femmene meglio d' 'e signure?
Federigo
Già: e po' lle tagliano 'a faccia!
Donn'Emilia
'On Federì, nun ce facimmo maste! Mo ce vo, io 'so femmena e avarria piglià 'e pparte d' 'e femmene. Ma sta vota Assunta ll'ha vuluto essa! Neh, diciteme na cosa; chesta nun teneva cielo pe vedé e terra pe cammenà, e chillo ha pigliato e ll'ha fatto uno 'e tutto: veste, scarpe, suttanine, cammise, l'armario, 'o sigrité; basta quanno ve dico uno 'e tutto, uno 'e tutto…
Federigo
Va bene, ma…
Donn'Emilia
Mo! E sentite! Vulette essere aperta na puteca 'e stiratrice a Sant'Aniello, e stu don Michele, piglie…