Czytaj książkę: «Les adevineaux amoureux»

La damoiselle demande.

Sire chevalier puis que temps et loisir avons de deviser afin aussi pour mieulx et plus sagement gouverner et conduire ma gentillesse en honneur/ je vous supplie et requiers que me dittes tout premierement qui est la cause pourquoy on aime.

Le chevalier.

Damoiselle moult grant chose me demandez mais a vostre correction et desplus sages et experimentez je treuve qu'ilz sont quatre manieres de desirs desquelz les poursuivans amours usent diversement. Le premier des desirs est de grant pris car on aime une dame ou damoiselle pour d'elle aprendre et mieulx valoir et pour le tresgrant bien et honneur qui est en elle et par ce acquerre honneur et pris. Le second desir qui est honneste est que on aime s'amie ou la damoiselle son ami pour avoir a mariage qui est saint estat Le tiers qui est lait et deshonneste est quant aucun aime pour attraire prouffit et gaing de sa partie Et le quart qui est naturel est quant on aime sa partie pour joyr a sa volenté et plaisance

La damoiselle

Sire chevalier lequel de ces desirs est le plus honneste et vault le mieulx.

Le chevalier.

Damoiselle le primier vault trop mieulx des autres car toutes manires de gens pevent amer par cellui desir sans en aucune manire meffaire.

La damoiselle.

Sire chevalier je vous demande en fleur de gentillesse lequel vous ameriez le meulx ou a joyr de voz amours sans desirer/ ou a desirer sans joir.

Le chevalier.

Damoiselle a les desirer sans en joir. Car nul ne puet savoir la grande vertu qui est en amours s'il n'a avant eu et sentu l'aguillon de loyal desir.

La damoiselle.

Sire chevalier aincoires vous demande lequel vous aimeriez mieulx ou a faillir a l'amour de vostre amie pour doubte que on ne s'en apperceust et par aventure qu'elle en peust estre blasmee ou a en joir par tel si qu'elle en demourast en celle aventure.

Le chevalier.

Damoiselle trop mieulx aimeroie a faillir de la joissance de son amour. Car je ne puis ne ne doy estre avanchié la ou madame en amours fust en riens amoindrie de son honneur.

La damoiselle.

Sage chevalier or me dittes lesquelles deux choses sont qui plus nuisent et font de mal en amours aux vrays et loyaux amans.

Le chevalier.

Damoiselle a mon aviz ce sont desir et paour. Car desir esmeut tousjours l'amant a requerir sa dame de merci. Et la paour qu'il a d'estre escondis l'esbahist telement qu'il n'ose ne scet parler a elle quant il s'i treuve.

La damoiselle

Sire chevalier je vous demande par contraire. qui sont les deux choses qui plus de bien font en amours aux vrais amans.

Le chevalier.

Certainement damoiselle ce sont souvenir et esperance. Car le souvenir lui met audevant la grande beauté et les grans biens qu'il a veus et trouvez en sa dame. Et esperance lui promet qu'elle aura de lui mercy.

La damoiselle.

Aincoires vous demande sire chevalier que me dittes qui sont les trois choses qui plus font durer amours entre amant et amie

Le chevalier.

Damoiselle je croy que ce sont sens loyauté et bien celer. Car sens aprent a bien et honneur savoir. Loyauté lui fait loyaument perseverer. Et bien celer tient les vrais amans soubz lui pour estre plus secrez.

La damoiselle.

Sire chevalier dittes moy en riant dont jalousie puet venir aux vrais amans.

Le chevalier.

Je cuide damoiselle qu'elle leur viengne de tresloyaument et de tresardanment amer. Car pou ou nul puet amer sans estre jaloux ou jalouse.

La damoiselle.

Et ceste jalousie dont nous parlons sire chevalier. puet elle faire aucun bien en amours.

Le chevalier.

Certes damoiselle oyl entant que les amans en deviennent plus secrés et mieulx celans et mettent paine a eulx sagement garder de faire chose qui desplaise a cellui ou a celle que on aime/ et ainsi en ceste chose est jalousie bonne et non autrement.

La damoiselle.

Sire chevalier je vous demande se vous amiez une damoiselle laquele demourast en aucune loingtaine contree/ et vous alaissiez par dela lequel ameriez vous mieulx ou que vous la trouveissiez mariee a aucun/ ou qu'elle fust de ce monde trespassee.

Le chevalier

Trop mieulx l'ameroie trouver trespassee de ce monde. Car combien que moult de paines et de melencolies en eusse a l'oublier aumoins je n'en verroye point joyr ung autre laquelle chose se mariee estoit force me seroit veoir et souffrir qui aincoires piz me feroit.

La damoiselle.

Sire chevalier je vous demande en quel temps les amans prendent plusgrant delit ou en recordant en eulx la beauté sens et honneur qu'ilz ont veu en leurs dames ou quant ilz les voient presentement.

Le chevalier.

Damoiselle je croy que c'est en recordant les graces et vertus de leurs dames/ Car quant l'amant voit sa dame en amours il est si souspris et si ravys de son amour et beauté que en sa penssee n'a nul arrest mais aprés quant il est absent et il pensse et remire en soy la grande beauté et les vertus d'elle et l'onneur dont elle est aornee il rechoit une leesse et plaisance en son cuer que ce lui est une seconde gloire et n'est homme qui le peust penser se esprouvé ne l'a

La damoiselle.

Sire chevalier aincorres vous demande se vous aviez un vostre bien amé compaignon lequel sceust tous vous secrez et vous pareillement les siens et entre vous deux amissiez une damoiselle lequel ameriez vous mieulz s'il convenoit qu'il fust ou que vous prensissiez s'amie a femme en mariage ou qu'il prensist la voustre.

Le chevalier

Damoiselle trop mieulx aimeroie qu'il preist la mienne. Car se je prendoie s'amie je lui ferroie desloyauté qui me tourneroit en vice et a villonnie laquele j'aime mieulx qu'il le me face que moy a lui combien qu'il m'en desplairoit moult et me tourneroit a grant tourment de le souffrir.

La damoiselle.

Sire chevalier ilz sont deux hommes qui tous deux aiment une damoisselle dont chascun d'eux cuide estre le mieulx amé. Or avient que eulx deux sont ung jour a une dansse et la damoiselle ou milieu laquele porte sur son chief un chapel de roses et l'un des compaignons aussi en porte un autre La damoiselle bien aprise prent le sien de dessus son chief et le met sur le chief de cellui qui point n'en a. Et tantost prent l'autre chappel de dessus le chief de cellui qui apporté l'avoit a la feste et le met sur son chief. Or vous demande auquel la damoiselle monstre le plusgrant signe d'amour.

Le chevalier.

Damoiselle elle monstre plusgrant signe d'amour a cellui duquel elle prent le chappel de dessus son chief. Car le prendre monstre signe de fiance et d'amours. et le donner est une courtoisie que toutes dames pevent faire sauve leur honneur.

La damoiselle.

Sire chevalier ilz sont deux hommes qui tous deux aiment une damoiselle/ et chascun d'eux lui requiert avoir guerredon de son service. La damoiselle veuillant user de courtoisie ottroye a l'un qu'il prengne d'elle ung seul baisier. Et de l'autre elle sueffre qu'il l'accole tant seulement. Or vous demande auquel elle monstre plusgrant signe d'amour.

Le chevalier.

Damoiselle sachiez que c'est a cellui auquel elle ottroye le baisier. Car cent milles accolers n'attainderoient pas a un baisier ottroyé d'une dame en amours.

La damoiselle.

Sire chevalier aincoires vous demande en toute honnesteté que me dittes se vous aviez une dame en amours et vous lui requeriez de son amour tant que par sa debonnaireté elle le vous ottroyast par tel couvenant que jamais plus ne lui demanderiez aucune chose. se vous accepteriez cestui marchié.

Le chevalier.

Certes damoiselle nennil. Car ce ne puet estre que en parfaite amour ait fin ne contredit d'aucunes choses que l'un amant puist faire a l'autre sauve son honneur.

La damoiselle.

Sire chevalier je vous demande aincoires une joyeuse demande et question. assavoir se vous estiez avec vostre dame d'amours en lieu secret du quel vous voz tendriez plus grevé/ ou s'elle vous disoit qu'elle eust le cuer dolent de ce que trop vous aimast: ou se elle regrettoit ung autre qu'elle eust amé avant vous.

Le chevalier.

Damoiselle trop mieulx aimeroie le premier que le second. Car de ce qu'elle regretteroit l'amour d'un autre ce me seroit trop grieve chose a oyr.

La damoiselle.

Sire chevalier je vous demande que me dittes se vous le savez au quel des deux grieve plus jalousie ou a l'omme ou a la femme

Le chevalier.

Certainement dame je croy que jalousie grieve plus a la femme que a l'omme et la raison si est pour ce que l'omme est franc et si a puissance et seignourie sur femme pour la corrigier et maistroier laquele chose n'a pas la femme par dessus l'omme et si puet homme aler franchement par tout ou il lui plaist que ne puet la femme pour quoy je croy que jalousie lui grieve plus que a l'omme qui est seigneur et maistre par dessus elle.

La damoiselle

Sire chevalier dittes moy par courtoisie se vous amiez une dame ou damoiselle que de vray vous sceussiez qu'elle ne vous amast point ne n'auriez espoir de jamaiz d'elle estre amé et vous eussiez un vostre compaignon et bon ami. vouldriez vous qu'il l'aimast et que d'elle fust amé.

Le chevalier.

Certes damoiselle point ne vouldroie qu'elle l'amast. Car jamais mon cuer ne se pourroit a ce consentir que je veisse un autre joyr de l'amour de madame et je en fusse mendiant.

La damoiselle.

Sire chevalier une joyeuse demande vous veuil demander. Se vous amissiez une dame de fine amour lequel ameriez vous le mieulx a avoir d'elle tous voz voloirs et plaisirs par tel si que jamais ne la veissiez ne parlissiez a elle. ou que la peussiez veoir et a elle parler sans la jamais touchier.

Le chevalier

Damoiselle trop mieulx ameroie a la veoir et parler a elle sans la touchier. Car trop seroit chose brutale et grieve a ung homme de estre en la compaignie de sa dame sans la jamais veoir ne povoir parler ne deviser a elle.

La damoiselle.

Sire chevalier pour mieulx savoir vostre corrage je vous demande que me respondez a une question assavoir se toutes graces estoient a vous a donner qui sont en amours et vous n'en peussiez donner a nullui que l'une tant seulement laquele donneriez vous a vostre dame en amours.

Le chevalier.

Dame je lui donneroie loyauté car entre toutes les vertus c'est la plus souveraine en amours.

La damoiselle.

Sire chevalier ilz sont deux gentilz hommes qui aiment une damoiselle. desquelz l'un lui requiert de son amour toutes les fois qu'il puet venir en place ou il puet trouver la damoiselle mais en elle ne puet trouver aucun merci car elle ne l'aime point. Et l'autre escuier ne l'ose requerre de son amour et si perchoit tresbien au semblant d'elle qu'elle l'aime tresloyaument Or vous demande lequel d'eux vit en plusgrant anoy de cuer et en plusgrande merancolie.

Le chevalier.

Dame je vous respons que ce doit estre cellui qui est escondis de s'amie. Car estre escondi de sa dame est la plusgrande angoisse que amans puissent recevoir en amours.

La damoiselle.

Sire chevalier aincoires veuil de vous savoir une gracieuse response. Ilz sont deux ou trois escuiers qui tous aiment une damoiselle et bien scevent tous l'un de l'autre et tant que tous d'un accord ilz vont parler a elle pour d'elle savoir auquel d'eux trois elle se vouldroit tenir par tel sy qu'ilz laisseront cellui qu'elle choisira en possession de l'amour d'elle.

La damoiselle subtile et bien aprise oye la requeste des trois escuiers s'aprocha de l'un d'eux et l'estraingny par le doy. Au second marcha sur le pied: Et au tiers gyngna de l'ueil. Or vous demande auquel elle donne plusgrant signe d'amour.

Le chevalier.

Damoiselle cellui a qui elle gingne de l'ueil car l'ueil c'est le messagier du cuer et non le doy ne le pied.

La damoiselle.

Sire chevalier pour rire je vous demande. S'il avenoit que vous amissiez dame ou damoiselle de parfaitte amour. et vous seussiez bien que un autre l'amast aussy parfaitement comme vous lequel auriez plus chier ou que tous deux faillissiez a l'amour d'elle sans jamais y recouvrer/ ou que tous deux en eussiez vostre desir et volenté

Le chevalier

Certes damoiselle trop mieulx ameroie que tous deux y faillissions Car plus tost vouldroit languir en sa merci attendant qu'elle fust ainsy de son honneur amoindrie.

La damoiselle.

Sire chevalier je vous demande se ainsy estoit que ne penssiez avoir l'ottroy de l'amour de vostre dame en amours fors par trayson se vous la prenderiez ou non

Le chevalier.

Damoiselle oyl. par tele condicion que la trayson ne fust trop ou deshonneur d'elle. car cestui vice seroit en aprés pardonnable.

La damoiselle.

Sire chevalier lequel de deux ameriez vous mieulx ou languir trois ans pour vostre amie et puis vous l'eussiez a femme a grande leesse. ou que prestement l'eussiez et puis que languissiez troys ans aprés.

Le chevalier.

Certes damoiselle que je languisse les trois ans premierement et puis en leesse l'espousaisse. Car grant desplaisir est de commencer chose que a joye ne se puisse achever.

La damoiselle.

Sire chevalier je vous demande lequel vous ameriez le mieux ou a perdre amours par vostre lacheté. ou a les gaignier par trayson.

Le chevalier.

Damoiselle a les gaignier par trayson. Car qui aime loyaument ne puet faire trayson pour acquerir l'amour de sa dame pour tant que ce ne soit tel deshonneur qui lui puisse tourner en reprocche.

La damoiselle.

Sire chevalier s'il avenoit que vous retournissiez des joustes ou tournoy ou d'aucun noble fait d'armes dont raportissiez le pris et l'onneur et vostre dame en amour vous demandast qui auroit eu l'onneur pour ce jour comment lui responderiez vous sans vous vanter.

Le chevalier.

Dame je lui diroie qu'elle en auroit eu le pris. Car se vray amant fait aucun bien qui lui soit tourné a loenge et honneur le pris en doit estre a sa dame pour l'amour de laquele il l'a fait.

La damoiselle.

Sire chevalier volentiers sauroie de vous duquel il y a le plus ou de pensseez en amours/ ou de suspris en cuer jaloux.

Le chevalier.

Damoiselle sachiez que en tous deux il en y a grant plenté mais je croy qu'il y ait plus de pensseez en amours que en cuer jaloux.

La damoiselle.

Sire chevalier aincoires vous demande quele chose appellent les amans le grant bien d'amours

Le chevalier.

Damoiselle c'est le don de merci paré de grase flouri de joye et enluminé de playsance.

La damoiselle.

Sire chevalier aincoires me plaist il savoir de vous une demande. ilz sont deux damoiselles soeurs toutes d'un sens et d'une beauté desqueles vous amez l'une parfaitement et si savez bien que point ne vous aime. Et l'autre vous aime de tout son cuer. Or est le cas tel qu'il leur fault passer une riviere. mais la fortune est qu'il convient l'une d'elles noyer. et en vous est de rescourre et sauver laquele qu'il vous plaist. Si vous prie que me dittes laquelle vous sauveriez ou celle qui vous aime ou celle qui point ne vous aime